- उपक्रमशील शिक्षिका कुंदा बच्छाव यांचा अभिनव आणि प्रेरणादायी उपक्रम
** एनजीएन न्यूज नेटवर्क
नाशिक : महानगरपालिका शाळा क्रमांक १८, आनंदवली येथील क्रांतीज्योती सावित्रीबाई फुले विद्यामंदिर मध्ये शिक्षणाचा नवा आयाम उलगडणारा एक अभिनव आणि प्रेरणादायी उपक्रम राबविण्यात आला आहे. उपक्रमशील शिक्षिका सौ. कुंदा बच्छाव यांनी विद्यार्थ्यांसाठी “Time Zone to Knowledge Zone” हा कल्पक उपक्रम साकारत, वर्गखोलीला अक्षरशः जागतिक ज्ञानाचे दालन बनवले आहे.
या उपक्रमाच्या माध्यमातून विद्यार्थ्यांना केवळ भारतापुरते मर्यादित न ठेवता, जगाच्या विविध कोपऱ्यांतील वेळेची जाण आणि त्या अनुषंगाने निर्माण होणाऱ्या फरकांचे सखोल आकलन करून देण्यात येत आहे. भारतीय प्रमाण वेळ (IST) आणि जागतिक प्रमाण वेळ (GMT) यांच्या तुलनेत लंडन, अमेरिका, आफ्रिका, जपान, कॅनडा अशा विविध देशांमधील वेळेतील तफावत विद्यार्थ्यांनी प्रत्यक्ष अनुभवातून समजून घेतली.
वर्गात लावण्यात आलेल्या दहा आकर्षक घड्याळांमुळे प्रत्येक देशाची वेळ स्वतंत्रपणे दर्शवली जाते. त्यामुळे विद्यार्थ्यांना “आता त्या देशात किती वाजले असतील?”, “तेथे दिवस आहे की रात्र?”, “पृथ्वीचे भ्रमण कसे चालते?” यांसारख्या प्रश्नांची उत्तरे सहज आणि आत्मविश्वासाने देता येऊ लागली आहेत.
याचबरोबर विद्यार्थ्यांनी संबंधित देशांची भौगोलिक वैशिष्ट्ये, नैसर्गिक परिस्थिती, भाषा, तसेच जागतिक नकाशावर त्यांचे स्थान यांचाही अभ्यास केला. विविध देशांचे राष्ट्रध्वज, त्यांचे रंग आणि त्यामागील अर्थ यांचीही ओळख विद्यार्थ्यांना झाली. त्यामुळे त्यांचे ज्ञान केवळ पाठ्यपुस्तकापुरते मर्यादित न राहता, जागतिक स्तरावर विस्तारले.
हा उपक्रम विद्यार्थ्यांच्या जिज्ञासेला चालना देणारा, त्यांच्या विचारांना व्यापक दिशा देणारा ठरला आहे. वर्गात बसूनच जगाशी जोडले जाण्याचा अनोखा अनुभव विद्यार्थ्यांना मिळाला असून, त्यांच्या बौद्धिक क्षितिजाचा विस्तार झाला आहे.
या अभिनव उपक्रमाबद्दल शाळेच्या मुख्याध्यापिका सौ. अनिता जाधव तसेच नाशिक मनपा प्रशासन अधिकारी डॉ. मीता चौधरी यांनी शिक्षिका सौ. कुंदा बच्छाव आणि त्यांच्या विद्यार्थ्यांचे विशेष कौतुक केले आहे.
अशा प्रकारे “Time Zone to Knowledge Zone” हा उपक्रम केवळ शिक्षणाची पद्धत बदलणारा नसून, विद्यार्थ्यांना जागतिक नागरिक बनवण्याच्या दिशेने टाकलेले एक प्रेरणादायी पाऊल ठरत आहे.
Comments are closed.