‘म्हाडा’ उपनिबंधकाच्या पत्नीचा टोकाचा निर्णय.. पतीवर केलेत गंभीर आरोप

मुंबई : एनजीएन न्यूज नेटवर्क

म्हाडामध्ये उपनिबंधक पदावर कार्यरत असलेल्या पतीच्या भ्रष्टाचाराला कंटाळून पत्नीने टोकाचे पाऊल उचलल्याची दुर्दैवी घटना मुंबईतील समतानगर पोलिस स्टेशन परिसराती घडली आहे. हा अधिकारी महिन्याला 40- 50 लाख रुपये अवैध मार्गाने कमावत होता ज्याला त्याच्या पत्नीचा विरोध होता. म्हाडाचे उपनिबंधक बाबुराव कात्रे यांच्याविरुद्ध पत्नीला आत्महत्या करण्यास प्रवृत्त केल्याबद्दल गुन्हा दाखल करण्यात आला आहे. रविवारी रेणू कात्रे यांनी लोखंडवाला येथील रहेजा कॉम्प्लेक्समधील फ्लॅटमध्ये गळफास घेऊन आत्महत्या केली. त्यांचा मृतदेह खोलीत फाशी घेत लटकलेल्या अवस्थेत आढळला.

मृत रेणू यांच्या भावाने एफआयआरमध्ये गंभीर आरोप केले आहेत. ज्यानुसार, म्हाडा अधिकारी बाबुराव कात्रे दरमहा बेकायदेशीरपणे सुमारे 40 ते 50 लाख रुपये काळा पैसा कमवत होते ज्याला रेणू यांचा विरोध होता. बेकायदेशीर पैसे घरी आणू नयेत कारण त्याचा मुलांवर वाईट परिणाम होईल, असे पत्नीचे म्हणणे होते. त्याचबरोबर बाबुराव कात्रे रेणूच्या वडिलांवर काळा पैसा पांढरा करण्यासाठी दबाव आणत असत आणि नकार दिल्यावर रेणूला मारहाण करत असत. भीती आणि दबावाखाली रेणूच्या वडिलांनी अनेक वेळा 15 ते 20 लाख रुपये मदत केली. घटनेच्या दिवशी रेणू यांच्या माहेरकडील मंडळींची आणि म्हाडा अधिकाऱ्याची पुण्यात भेट होणार होती ज्यामध्ये या सर्व वादावर तोडगा निघणार होता. परंतु काल संध्याकाळी बाबुराव यांनी भेटण्यास स्पष्ट नकार दिला. यावरुन पती -पत्नीत वाद झाला ज्यामध्ये रेणू कात्रे यांनी आत्महत्या केली.

याप्रकरणी, समता नगर पोलिसांनी या प्रकरणात भादंविच्या कलम 306 आणि इतर संबंधित कलमांखाली एफआयआर दाखल केला आहे आणि आरोपीचा शोध सुरू केला आहे. बाबुराव कात्रे सध्या फरार आहे. मृताच्या भावाने या प्रकरणाची उच्चस्तरीय चौकशी करण्याची मागणी केली आहे आणि गुन्हेगाराला लवकरात लवकर शिक्षा व्हावी असे म्हटले आहे.