NGN News
Latest Marathi News

रक्ताच्या प्रत्येक थेंबातून माणुसकीचा दीप प्रज्वलित करणारा ‘रक्तमित्र’

  • डॉ. दिलीप कोठावदे यांचा १८व्या वर्षापासून सुरू झालेला १५० रक्तदानांचा प्रेरणादायी सेवाप्रवास

** एनजीएन न्यूज नेटवर्क

नाशिक : रक्ताला जात नसते, धर्म नसतो, प्रांत नसतो… रक्ताची एकच ओळख असते—माणुसकी! या विचाराला केवळ ब्रीदवाक्य न मानता जीवनाचे ध्येय बनविणाऱ्या ज्येष्ठ पत्रकार डॉ. दिलीप केदारनाथ कोठावदे यांनी आपल्या रक्तदानाच्या सेवाकार्यात दीड शतकाचा टप्पा पूर्ण केला आहे. त्यांच्या १५० व्या रक्तदानानिमित्ताने लाडशाखीय वाणी समाज सन्मित्र मंडळाच्या वतीने जनकल्याण रक्तपेढीच्या सहकार्याने आयोजित करण्यात आलेल्या रक्तदान शिबिरात ६५ रक्तदात्यांनी रक्तदान केले.

कोठावदे यांनी वयाच्या अवघ्या १८व्या वर्षी सुरू केलेला त्यांचा हा जीवनरक्षक प्रवास आज वयाच्या ५६व्या वर्षीही त्याच उत्साहाने आणि सेवाभावाने सुरू आहे.

गेल्या ३८ वर्षांचा त्यांचा रक्तदानाचा प्रवास हा केवळ १५० रक्तदानांचा आकडा नाही; तर असंख्य गरजू रुग्णांसाठी उभ्या राहिलेल्या माणुसकीच्या आधाराची ही कहाणी आहे. एका रक्तदानातून अनेक रुग्णांना जीवनदान मिळू शकते, या भावनेतून त्यांनी स्वतः रक्तदान करण्याबरोबरच समाजात रक्तदानाची चळवळ रुजविण्यासाठी सातत्याने प्रयत्न केले.

पत्रकारितेच्या माध्यमातून सामाजिक प्रश्नांना वाचा फोडताना त्यांनी रक्तदानाचे महत्त्वही समाजमनावर ठसविले. त्यांच्या आवाहनातून आणि प्रत्यक्ष सहभागातून रक्तदान संकलनाची व्यापक साखळी निर्माण झाली. अपघातातील गंभीर रक्तस्राव असो, दुर्मिळ रक्तगटाची गरज असो किंवा मध्यरात्रीची वैद्यकीय आणीबाणी—गरजू रुग्णासाठी रक्ताची हाक आली की धावून जाणे, हा त्यांच्या सेवाभावी जीवनाचा अविभाज्य भाग बनला.

रक्ताचा एक थेंबही एखाद्याच्या आयुष्यात आशेचा किरण ठरू शकतो, या जाणिवेतून त्यांनी रक्तदानाला केवळ सामाजिक उपक्रम न मानता जीवनदानाची चळवळ मानले. त्यामुळेच अनेक गरजू कुटुंबांसाठी ते केवळ रक्तदाता राहिले नाहीत, तर संकटकाळात मदतीचा विश्वासू आधार ठरले.

या प्रदीर्घ सामाजिक आणि रक्तदानाच्या कार्याची विविध स्तरांवर दखल घेण्यात आली असून, त्यांना ‘गांधी पीस फाउंडेशन’ची मानद डॉक्टरेट तसेच रक्तदानाचे शतक करणारा जगातील एकमेव पत्रकार या विश्वविक्रमासह देश-विदेशातून २०० हून अधिक पुरस्कारांनी सन्मानित करण्यात आले आहे.

मात्र, पुरस्कारांपेक्षा एखाद्या अनोळखी रुग्णाच्या शरीरात आपल्या रक्ताचा थेंब पोहोचून त्याला नवजीवन मिळणे, हेच आपल्या सेवाकार्याचे खरे समाधान असल्याची भावना डॉ. कोठावदे यांच्या रक्तदानाच्या प्रवासामागे आहे.

१८व्या वर्षी सुरू झालेला रक्तदानाचा एक छोटासा संकल्प आज १५० रक्तदानांच्या दीडशतकात रूपांतरित झाला आहे. या प्रवासातून त्यांनी एक संदेश अधोरेखित केला आहे—
“रक्तदान ही केवळ देण्याची कृती नाही; ती कोणाच्यातरी जीवनाशी जोडली जाणारी माणुसकीची नाळ आहे.”

डॉ. दिलीप कोठावदे यांच्या या दीर्घ रक्तदान सेवाकार्याबद्दल सन्मित्र लाडशाखीय वाणी समाजाच्या वतीने आमदार सीमाताई हिरे,महेश हिरे,नगरसेवक राजेंद्र महाले,नगरसेविका कविता नाईक,ऍड.तानाजी जायभावे, अमोल नाईक,सन्मित्र मंडळाचे संथापक,उद्योजक मधुकर ब्राम्हणकर, अध्यक्ष निलेश मकर,गिरीश महाजन,भुषण महाजन,आदी मान्यवरांच्या उपस्थितीत त्यांचा सहकुटुंब विशेष सन्मान करण्यात आला. तसेच जनकल्याण समितीसह विविध संस्था,मंडळे,राजकीय व सामाजिक कार्यातील अनेक मान्यवरांनी त्यांचा गौरव करत अभिनंदन केले.
त्यांच्या या सेवाप्रवासातून रक्तदानाची प्रेरणा घेऊन समाजातील अधिकाधिक तरुणांनी पुढे यावे, हीच त्यांच्या कार्याची खरी फलश्रुती ठरा

Comments are closed.