झी5 वर ‘फ्रेम’ प्रीमियर: कर्तव्य आणि विवेकबुद्धी यांच्यातील संघर्षाची प्रभावी कथा

नाशिक: एनजीएन न्यूज नेटवर्क

 मराठी झी5ने ‘फ्रेम’या आपल्या आगामी ओरिजिनल चित्रपटाची घोषणा केली आहे. व्यावसायिक जबाबदारी आणि माणुसकी यांच्यातील नाजूक सीमारेषेचा वेध घेणाऱ्या या प्रभावी सामाजिक चित्रपटाच्या कथानकात सतत नैतिक मूल्यांची कसोटी घेण्यात आली आहे. विक्रम पटवर्धन यांनी लेखन आणि दिग्दर्शन केलेल्या या चित्रपटात नागराज मंजुळे, अमेय वाघ, मुग्धा गोडसे आणि अक्षया गुरव यांच्या प्रमुख भूमिका आहेत. या चित्रपटाची निर्मिती आटपाट आणि झी स्टुडिओज यांनी केली आहे.फोटो जर्नालिझमच्या माध्यमातून शोकांतिकेचे चित्रण करताना त्यासाठी मोजावी लागणारी भावनिक आणि नैतिक किंमत हा या चित्रपटाचा मध्यवर्ती विषय आहे. चित्रपटाचा प्रीमियर 10 जुलै 2026 रोजी मराठी झी5वर होणार आहे.

 ‘फ्रेम’ हा एक प्रभावी सामाजिक चित्रपट असून तो व्यावसायिक जबाबदारी आणि माणुसकी यांच्यातील नाजूक सीमारेषेचा वेध घेतो. नैतिकतेची सतत परीक्षा घेणाऱ्या आणि योग्य-अयोग्य यांच्यातील सीमा अनेकदा धूसर होणाऱ्या परिस्थितीचे वास्तवदर्शी चित्रण या चित्रपटात आहे. पुण्यातील एका वृत्तपत्राच्या न्यूज रूमच्या पार्श्वभूमीवर घडणाऱ्या या कथेत अनुभवी छायाचित्र पत्रकार चंदू पानसरे आणि आदर्शवादी नवोदित सिद्धार्थ देशमुख यांच्या प्रवासातून व्यावसायिक कर्तव्य आणि संवेदनशीलता यांच्यातील संघर्ष उलगडला जातो. “आधी फोटो, मग बाकी सगळं” या भूमिकेवर ठाम असलेला चंदू आणि माणुसकी जपत पत्रकारिता करण्याचा प्रयत्न करणारा सिद्धार्थ यांच्यातील विचारांचा संघर्ष या चित्रपटाचा गाभा आहे.विनाशकारी भूकंपामुळे या दोघांच्या परस्परविरोधी विचारांची खरी कसोटी लागते. मृत्यू, विध्वंस आणि जगण्यासाठीच्या संघर्षाने व्यापलेल्या परिस्थितीत ते सापडतात. ढिगाऱ्याखाली दबलेल्या आयुष्यांचे, अपरिमित दुःखाचे आणि आशेचे क्षण कॅमेऱ्यात टिपताना निरीक्षकाची भूमिका आणि प्रत्यक्ष सहभागी असलेल्या व्यक्तीची भूमिका यांच्यातील सीमारेषा हळूहळू धूसर होत जाते. प्रत्येक छायाचित्र टिपायचे की नाही, या निर्णयासोबत त्यांना स्वतःच्या मूल्यांचा पुनर्विचार करावा लागतो. मानवी दुःखाचे साक्षीदार होण्याची आणि त्याचे दस्तावेजीकरण करण्याची भावनिक व नैतिक किंमत त्यांना अनुभवावी लागते.

झी मराठीच्या चीफ चॅनल ऑफिसर आणि मराठी झी5 च्या बिझनेस हेड व्ही. आर. हेमा म्हणाल्या ,“मराठी झी5 हे महाराष्ट्रातील दर्जेदार आणि प्रभावी कथांसाठीचे विश्वासार्ह व्यासपीठ बनले आहे. त्याच ध्येयाशी सुसंगत असा ‘फ्रेम’ हा चित्रपट आम्ही प्रेक्षकांसमोर आणत आहोत. व्यावसायिक जबाबदारी आणि मानवी संवेदनशीलता यांचा संघर्ष समोर आल्यावर माणसाला कोणते कठीण निर्णय घ्यावे लागतात, याचा वेध घेणारा हा प्रभावी चित्रपट आहे. नागराज मंजुळे, अमेय वाघ आणि विक्रम पटवर्धन यांसारख्या गुणी कलाकार व दिग्दर्शकांसोबत काम करत अशा आशयघन आणि विचार करायला लावणाऱ्या कथा ओटीटीवर सादर करताना आम्हाला अभिमान वाटतो. मनोरंजनासोबत प्रेरणा देणाऱ्या आणि दीर्घकाळ प्रभाव टाकणाऱ्या अस्सल मराठी कथा प्रेक्षकांपर्यंत पोहोचवण्याच्या आमच्या प्रयत्नांतील आणखी एक महत्त्वाचे पाऊल म्हणजे ‘फ्रेम’.”

दिग्दर्शक विक्रम पटवर्धन म्हणाले ,“‘फ्रेम’ हा केवळ कॅमेऱ्याच्या नजरेतून नव्हे, तर माणुसकीच्या दृष्टीकोनातूनही जगाकडे पाहण्याचा प्रयत्न आहे. चंदू आणि सिद्धार्थ यांच्यातील नात्याच्या माध्यमातून कथाकथन आणि जगण्याकडे पाहण्याच्या दोन वेगळ्या दृष्टिकोनांचा शोध घेण्याची संधी आम्हाला मिळाली. आयुष्यातील अनिश्चितता आणि अनपेक्षित वळणांचाही हा चित्रपट वेध घेतो. अशा परिस्थितीत व्यावसायिक जबाबदारी आणि माणुसकी यांच्यातील धूसर होत जाणाऱ्या सीमारेषेवर व्यक्तिरेखा उभ्या राहतात, जिथे कर्तव्य आणि करुणा यांपैकी एकाची निवड करणे हेच सर्वांत मोठे आव्हान असते.”

नागराज मंजुळे म्हणाले,“चंदू ही पारंपरिक नायकाची व्यक्तिरेखा नाही. त्यामुळे त्याची भूमिका साकारणे माझ्यासाठी तितकेच रंजक आणि आव्हानात्मक होते. तो आपल्या कामाप्रती अत्यंत समर्पित आहे, तडजोड न करणारा आहे आणि वास्तवाचे दस्तावेजीकरण करणे हेच आपले काम आहे, त्यात हस्तक्षेप करणे नव्हे, असा त्याचा ठाम विश्वास आहे. मात्र चित्रपटभर त्याच्या या धारणांची कसोटी लागते. त्याच्या भूमिकेशी सहमत व्हावे की नाही, याबाबत प्रेक्षकही स्वतःलाच प्रश्न विचारू लागतील.”

अमेय वाघ म्हणाला ,“सिद्धार्थ ही संवेदनशीलता, आदर्शवाद आणि आव्हानात्मक क्षेत्रात पाऊल ठेवताना अनेक तरुण व्यावसायिकांच्या मनात निर्माण होणाऱ्या प्रश्नांचे प्रतिनिधित्व करणारी व्यक्तिरेखा आहे. ‘फ्रेम’मधील त्याचा प्रवास म्हणजे महत्त्वाकांक्षा आणि जबाबदारी यांच्यामध्ये संवेदनशीलतेला नेमके कुठे स्थान द्यायचे, याचा शोध आहे. त्याचा संघर्ष आणि त्याच्यासमोर उभे राहणारे निर्णय प्रेक्षकांना नक्कीच भावतील, असा मला विश्वास आहे.”

झी5 विषयी:

झी5 हा भारतातील सर्वात मोठा स्वदेशी व्हिडिओ स्ट्रीमिंग प्लॅटफॉर्म असून दक्षिण आशियाई आशयासाठीचे जागतिक व्यासपीठ म्हणून हा प्लॅटफॉर्म 190 हून अधिक देशांतील प्रेक्षकांपर्यंत पोहोचतो. झी एंटरटेनमेंट एंटरप्रायझेस लिमिटेड या आघाडीच्या कंटेंट आणि तंत्रज्ञान कंपनीचे स्ट्रीमिंग प्लॅटफॉर्म असलेल्या झी5मध्ये ‘अपनी भाषा, अपनी कहानियां’ या संकल्पनेनुसार भाषा-केंद्रित दृष्टिकोन स्वीकारण्यात आला आहे. हिंदी, तमिळ, तेलुगू, बंगाली, मल्याळम, कन्नड आणि मराठी या सात भाषांमध्ये स्थानिक कंटेन्ट, भाषानिहाय पॅक्स आणि वैयक्तिक पसंतीनुसार अनुभव उपलब्ध करून दिले जातात. ओरिजिनल्स, भारतीय आणि आंतरराष्ट्रीय चित्रपट, टीव्ही कार्यक्रम, मुलांसाठीचा कंटेन्ट, बातम्या, लाइव्ह टीव्ही आणि लघुरूप मायक्रो ड्रामाज अशा विविध प्रकारच्या बहुभाषिक कंटेन्टच्या विस्तृत संग्रहासह झी5 हे जगभरातील भारतीय प्रेक्षकांसाठी एक विश्वासार्ह व्यासपीठ आहे.