८,००० हून अधिक नागरिकांचा सामुहिक ‘योग’; ‘वायआय नाशिक’चा विक्रम

** एनजीएन न्यूज नेटवर्क

नाशिक : ‘यंग इंडियन्स’ (YI) नाशिक चॅप्टर हे कॉन्फेडरेशन ऑफ इंडियन इंडस्ट्री (CII) ची youth विंग असून यंदाच्या आंतरराष्ट्रीय योग दिनानिमित्त एक नवा इतिहास रचला आहे. नाशिकमधील विविध शाळा आणि संस्थांमधील ८,००० हून अधिक विद्यार्थी आणि शिक्षकांना एकत्र आणत एकाच वेळी भव्य योग उपक्रमाचे आयोजन करण्यात आले होते. या वर्षी नाशिक शहरात आणि देशभरातील ‘यंग इंडियन्स’च्या इतर सर्व चॅप्टर्समध्ये नोंदवला गेलेला हा आजवरचा सर्वात मोठा सहभाग ठरला आहे.

या यशस्वी उपक्रमाचे नेतृत्व ‘वायआय नाशिक’च्या हेल्थ विभागाच्या अध्यक्षा अ‍ॅड. सुरभी तोष्णीवाल यांनी केले. त्यांनी ‘युवा’ (YUVA) सदस्यांना विशेष प्रशिक्षण दिले होते, ज्यांनी पुढे जाऊन विविध शैक्षणिक संस्थांमध्ये या योग सत्रांचे अत्यंत प्रभावीपणे संचालन केले.

या उपक्रमाबाबत बोलताना ‘वायआय नाशिक’च्या अध्यक्षा पारुल धाडिच आणि सह-अध्यक्ष उज्ज्वल चांडक यांनी सांगितले की, “तरुणांमध्ये सर्वांगीण आरोग्य, मानसिक स्वास्थ्य आणि शिस्त रुजवून भविष्यातील खंबीर नेतृत्व घडवण्यासाठी असे उपक्रम अत्यंत महत्त्वाचे आहेत.” तसेच या संपूर्ण उपक्रमाचे अचूक नियोजन आणि अंमलबजावणी करण्यात कमलेश ठाकूर यांनी अत्यंत महत्त्वाची भूमिका बजावली.

‘CII’ची युवा शाखा असलेली ‘यंग इंडियन्स’ (YI) संस्था आपल्या विविध नाविन्यपूर्ण उपक्रमांद्वारे तरुण मनांना सक्षम बनवण्याचे काम सातत्याने करत आहे. नाशिकमध्ये नोंदवला गेलेला हा विक्रमी सहभाग, तरुणांच्या नेतृत्वाखाली सामाजिक बदलाचे किती मोठे आणि सकारात्मक परिणाम होऊ शकतात, याचेच एक उत्तम उदाहरण आहे.