सीजी पॉवरच्या अति-उच्च दाबाच्या स्विचगिअर निर्मिती प्रकल्प कामकाजास नाशकात प्रारंभ

नाशिक : एनजीएन न्यूज नेटवर्क

इंजिनीअरिंग क्षेत्रातील एक प्रमुख समूह आणि इलेक्ट्रिकल इंजिनिअरिंग उद्योगातील अग्रेसर कंपनी असलेल्या सीजी पॉवर अँड इंडस्ट्रियल सोल्युशन्स लिमिटेडने नाशिक जवळ पिंपळगाव गरुडेश्वर येथे आपल्या ‘एक्स्ट्रा हाय-व्होल्टेज’ (ईएचव्ही) स्विचगिअर उत्पादन प्रकल्पाचे (एस3 युनिट-2) कामकाज सुरू केल्याची घोषणा आज केली. नाशिकमधील अंबड येथील ‘एस3 युनिट-1’ या उत्पादन प्रकल्पाव्यतिरिक्त हा प्रकल्प सुरू करण्यात आला आहे; या ‘ एस3 युनिट-1’ मध्ये 33 केव्ही ते 800 केव्ही क्षमतेच्या ईएचव्ही सर्किट ब्रेकर्सचे उत्पादन केले जाते.

या नवीन प्रकल्पामध्ये 33 केव्ही ते 245 केव्ही श्रेणीतील ईएचव्ही सर्किट ब्रेकर्सचे उत्पादन केले जाईल आणि यामुळे सीजीच्या ईएचव्ही सर्किट ब्रेकर उत्पादन क्षमतेत 80% वाढ होईल. 500 केव्ही आणि 350 केव्ही च्या उच्च-व्होल्टेज चाचणी प्रयोगशाळांसह प्रगत उत्पादन आणि चाचणी सुविधांनी सज्ज असलेला हा प्रकल्प, देशांतर्गत तसेच आंतरराष्ट्रीय बाजारपेठांमधील विश्वसनीय वीज पारेषण उपकरणांची वाढती मागणी पूर्ण करण्यासाठी उभारण्यात आला आहे.

या सुविधेमुळे युटिलिटीज, रेल्वे, नवीकरणीय ऊर्जा, तेल आणि वायू, आणि पारेषण पायाभूत सुविधा प्रकल्प यांसारख्या महत्त्वपूर्ण क्षेत्रांना सेवा देण्याची सीजीची क्षमता बळकट होते. यामुळे कंपनीच्या वाढत्या निर्यात व्यवसायालाही पाठबळ मिळेल.जबाबदार उत्पादनाप्रती असलेल्या सीजीच्या वचनबद्धतेनुसार उभारलेल्या या सुविधेमध्ये ऊर्जा-कार्यक्षम प्रणाली, पर्जन्यजल संचयन आणि जल पुनर्वापर पायाभूत सुविधा, आणि शून्य द्रव विसर्जन कार्यप्रणाली यांचा समावेश आहे. या उपक्रमांमुळे संसाधनांची कार्यक्षमता सुधारेल, तसेच ऊर्जेचा वापर आणि पर्यावरणावरील परिणाम कमी होईल अशी अपेक्षा आहे.

सीजी पॉवर अँड इंडस्ट्रियल सोल्युशन्स लिमिटेडचे ग्रुप सीईओ आणि व्यवस्थापकीय संचालक अमर कौल म्हणाले, ” एस3 युनिट-2 ची सुरुवात हा आमच्या विकासाच्या प्रवासातील एक महत्त्वाचा टप्पा आहे. तसेच, ग्रीडचा विस्तार, अक्षय्य ऊर्जेचा समावेश आणि पायाभूत सुविधांचा विकास यातून निर्माण होणाऱ्या संधींबाबतचा आमचा आत्मविश्वास यातून दिसून येतो. भारत आणि जागतिक बाजारपेठांमध्ये उच्च-व्होल्टेज ट्रान्समिशन उपकरणांची मागणी वाढत असतानाच या सुविधेमुळे मोठ्या प्रमाणावर जागतिक दर्जाची उत्पादने पुरवण्याची क्षमता आम्हाला मिळते. नावीन्य, गुणवत्ता आणि उत्कृष्ट कार्यपद्धतीद्वारे ग्राहकांच्या बदलत्या ऊर्जा गरजा पूर्ण करण्याच्या आमच्या वचनबद्धतेला ही गुंतवणूक अधिक बळकट करते.”